5 حاجات متقولهاش لواحدة لسة والدة

بما إن دي أول مرة أكتب من أكتر من سنة في المدونة.. فكان لازم أختار موضوع  يعبر عني بزيادة في هذه المرحلة الحرجة في حياتي بعد ما أنس جاء إلى هذا العالم البغيض..

الصدفة كانت إن فيه كذا واحدة من صحباتي خلّفوا في نفس الوقت.. وده ادّاني تأكيدات على كذا حاجة سواء في التعامل مع أنس أو مع البشر اللي بيتعاملوا معايا بعد ما خلفت.. وواضح إن فيه اتفاق غير معلن على بعض الجمل اللي بتقولها كائنات مستفزة وأحب أحذر البشرية منها من أجل غد أفضل لكل أم فيها اللي مكفيها:

1- “انتي لسة شفتي حاجة؟” – كائنات ليها سوابق في الأمومة

دي على رأس القائمة.. هناك مكان في الجحيم إن شاء الله يعني -زي ما كتبت في ستاتس قبل كدة عالفايسبوك- للي اخترع الجملة دي.. يعني تخيل نفسك بتغرق في بحر من الرمال المتحركة وييجي واحد بدل ما يقوللك نصيحة تعرف تطلع بيها ولا يرميلك حبل ولا حتى يواسيك يقوللك: انتا لسة شفت حاجة؟ ده لسة بقى لما الرملة توصل لبقك.. هتبقى في وضع كدة إيه مقولكش!

من فضلِك لو لقيتي أي أم بتشتكي من أي حاجة مع ابنها/بنتها ومعندكيش نصيحة أو مواساة أو دعوة مفيدة خللي تجاربِك السودة لنفسِك ومتبشريهاش بالسواد اللي جاي علشان مش طالباها..

2- “ده خاسس أوي” – كائنات شافت البيبي كذا مرة

معلومة عامة: أي أم جديدة بيبقى عندها هِسهِس اسمه البيبي مش بيشبع.. البيبي جعان ولا لأ.. البيبي دبلان.. الخ.

معلومة عامة بس مش معروفة أوي: الطفل في خلال أول أسبوع من حياته ممكن يعيش عالجلوكوز بس أو ما يوازي معلقتين شاي من اللبن كل يوم.

 مهما كانت نظراتك ثاقبة فمفيش أي عين بشرية على وجه الأرض بتعرف تشوف وتحسب الزيادة في وزن طفل لسة مولود بيزيد بمعدل ربع كيلو في الأسبوع.. الوحيد اللي ليه حق يقول الجملة دي دكتور الأطفال.. وبناءً عليه متجيش انتا تزود قلقها من الموضوع ده والنبي

3- “انتي بترضعي طبيعي ولا صناعي؟” – كائنات فضولية 

أصلها لو بترضع طبيعي هتخاف من الحسد لدرجة إنها -لو شخصيتها ضعيفة شوية- ممكن تكذب وتقوللك حاجات من نوع”ده لبني قليل خالص” أو حتى “لأ” علشان “تداري على شمعتها”.. ولو بترضع صناعي هتفكرها بعقدة ذنب كل أم بترضع صناعي إنها مش بتدي أحسن حاجة لابنها.. وهي أصلًا معلومة مش هتفرق معاك أيًا كان نوع علاقتك بيها! الرضاعة -أيًا كان نوعها- من أكبر التحديات والصعوبات اللي بتواجه الأم الجديدة.. فعلى إيه النكد؟

4- “كلي/متاكليش/اشربي/متشربيش (كذا)” – كائنات نصوحة بالفطرة

أنا مرة كنت هتخانق فعليًا مع طنط من الطنطات اللي جت تزورني بعد ما ولدت لإصرارها إني لازم أشرب حلبة.. طب يا طنط أنا مبحبهاش.. لأ لازم تشربيها.. يا طنط مش بطيقها.. لأ هي الأمومة كدة.. بجد الست وصلتني لدرجة إني كنت هسبّ الأمومة عاللي عايزين يبقو أمهات!

مفيش أي حاجة في الأكل والشرب بتعمل التأثير السحري اللي بيحلموا بيه (بالذات في إدرار اللبن) مع كل الناس.. أعرف ناس هَرِت نفسها حلبة وبرضه معرفوش يرضعوا طبيعي.. ممكن تقولها بحسن نية إن “بيقولو كذا مفيد”.. لكن لهجة “لازم” دي ارميها على باب أوضة المستشفى وانتا داخل تزور الولية الغلبانة لو سمحت..

5-”أومال لما يبقى عندك اتنين وتلاتة هتعملي إيه؟” – كائنات أرنبة

الجملة دي تصديقًا لقول الشاعر “اختلاف الليل والنهار يُنسي”.. جملة متطلعش فعلًا إلا من حد نسي -أو مجربش قبل كدة- العذاب اللي بتبقى فيه أي أم لسة والدة جديد من وجع وإرهاق وقلة نوم وإحساس بالمسئولية الفظيعة والفشل المريع في نفس ذات الوقت.. تيجي انتا بقى حضرتك تقوللي إن التجربة دي احتمال -أو المفروض حسب كلامك- تتكرر؟!! أنا لسة لحد دلوقتي مش قادرة أفهم الناس بتفكر تخلف أكتر من طفل ليه وإزاي.. لحد ما أوصل لإجابة مش محتاجة حد يحسسني بفشلي في إدارة طفل واحد ويبشرني بفشل أكتر مع أطفال أكتر!

المجد للأمهات..

اترك تعليقًا ?

1 تعليقات.

اترك تعليقًا


NOTE - You can use these HTML tags and attributes:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>